Кыз елату җырлары, сыктаулар

Кыз бала - килгән кунактыр

Әтекәмнең генә капкасын
Вата гына типтем тактасын;
Сакладың әтекәй, сакладың,—
Бирәсе лә җирең тапмадың.

Түгәрәк лә күлнең уртасында
Аучыларның¹ тора казыгы²
Сөймәгән ярга димләп куйган
Саучыларга ³ булсын языгы.

Аякларым минем атулы ⁴,
Башкынаем минем сатулы;
Көндезге йөрүем көтүле,
Төнге йокыларым бетүле.

Кечкенә генә турчай ⁵ баласы,
Сикереп лә менмәң ⁶, биле авырыр;
Кыз балалар — килгән кунактыр,
Каты сүзләр әйтмәң — яне⁷ авырыр.

¹ Аучы - балыкны ау (җатмә) белән тотучы
² Казык - ау (җәтмә) бәйли торган казык
³ Саучы - яучы
⁴ Ату — читек.
⁵  Турчай —турыча  (туры)  ат
⁶  Менмәң — менмәгез.
⁷ Яне — җаны.

I. ФФ,  1970, Төмән өлкәсе Тобол районы Котлыбай авылында Оркыя Хәсәновадан   Ф.   Әхмәтова   язып   алган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты