Кыз елату җырлары, сыктаулар

Ризкым кала, әнкәем

Кое суга таш атсаң,
Батар китәр, әнкәем;
Чит җирләргә кыз сатсаң,
Ят итәрләр, әткәем.

Минем китәр юлыма
Балан утырт, әнкәем;
Балан беркөн корыса,
Балам, диген, әткәем.

Минем китәр юлыма,
Чаган утырт, әнкәем;
Чаган беркөн корыса,
Чалдым, диген, әткәем.

Туган йортым-бишектә
Ризкым кала, әнкәем;
Кайнап торган казанга
Кызың салаң¹, әткәем.

Дус кызларым сораса,
Үлде, диген, әнкәем;
Агам-җиңгәм сораса,
Гүрдә, диген, әткәем.

¹  Салаң — саласың.

I. Р. Мөхәммәтҗанов. Туй йола поэзиясе. «Татар әдәбияты мәсьәләләре», Уфа, 1972, 37—38 битләр. Текст Башкортстанның Ярмәкәй районы Иске Турай авылында Гөлмәдинә Сәмигуллинадан  Р.  Мөхәммәтҗанов  тарафыннан  язып  алынган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты