Кыз елату җырлары, сыктаулар

Ах,  кәбәм, анакай

Чыбылдык кынам чуп-чуар
Чебен генә кунса, кем куар?
Бөгәчә ¹ түгел, таңда кич ²
Минем куначамда³ кем кунар?
Ах, кәбәм, анакай,
Минем куначамда кем кунар?

Чыбылдыгымны кордыгыз,
Чәчәге саен тордыгыз;
Ни гаебемне тойдыгыз
Яшьли муенымны бордыгыз?
Ах, кәбәм, анакай,
Яшьли муенымны бордыгыз?

Әтекәемнең түрендә
Утырыр гына урыным бер такта;
Уйнаган гынам, көлгән генәм,
Кала тудыкайлар ⁴ бу якта.
Ах, кәбәм, анакай,
Кала тудыкайлар бу якта.

Тастымал гынам киң түгел,
Ябыныр гына идем, иң түгел;
Уйнар гына идем, көләр идем,
Юлдаш булыр кешем тиң түгел.
Ах, кәбәм, анакай,
Юлдаш булыр кешем тиң түгел.

Йөрерсең, анакай, йөрерсең,
Буш куначага керерсең;
Буш куначада мин булмам,
Сары май кебек эрерсең.
Ах, кәбәм, анакай,
Сары май кебек эрерсең.

Ишек алдында бер кискә ⁵,
Ватып бәр, анакай, бер мичкә;
Чыгып та сора шул ятлардан,
Калдырмаслармы бер кичкә?
Ах, кәбәм, анакай,
Калдырмаслармы бер кичкә?

Өстәл өстендә катлама,
Кап дисәгез дә капмамын;
Кабактан ⁶ чыгып киткәчтен,
Кайт дисәгез дә кайтмамын.
Ах, кәбәм, анакай,
Кайт дисәгез дә кайтмамын.

¹ Бөгәчә— бүген.
² Таңда   кич— иртәгә.
³ Кунача — йокы   бүлмәсе
⁴ Тудыкайлар-биредә «туганнар» мәгънәсендә
⁵ Кискә — ярылмый торган утын.
⁶ Кабак — капка

I. ФФ. 1958, Пенза өлкәсе Городище районында кыз елату җырларын «Әтеки әйттерү» дип йөрткәннәр. Җырны Урта Әләзән авылында Маһирә Абитовадан Э. Касыймов   язып   алган.

II. ТХҖ,   239   бит.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты