Кыз елату җырлары, сыктаулар

Ай-һай, башым,  яшь  башым

Казаннан килгән калпак
Мамыклырак булса иде;
Минем юлдаш буласым
Аңлы башлы булса иде,
Аңлы башлы булмаса,
Гомере кыска булса иде.

Алтмыш колач кыл аркан
Ат муйнына сыйса ла,
Баш бармактай бер башым
Әти өенә сыймый ла.

Кич кечкенә елгадан
Сикереп кичеп булмады;
Җан сөймәгән малайдан
Качын котылып булмады.

Кара болыт килә лә,
Яумый китсә яхшы иде;
Мине алырга киләләр,
Алмый китсә яхшы иде.

Нарат такта — буй такта,
Ярармы олы якка;
Ай-һай, башым, яшь башым,
Ярармы җиде ятка.

Әй, күк болыт, күк болыт
Кара болыт астында;
Ай-һай, башым, яшь башым,
Ак бөркәнчек астында.

Иртән иртүк торырсың,
Таянырсың киртәгә;
Ай-һай, башым, яшь башым,
Монда булмас иртәгә.

Имән такта — буй такта,
Буе кыска булса иде;
Киткән җирем уңмаса,
Гомерем кыска булса иде.

I. ФФ, 1953. Җырлар (9-11) Татарстанның Подберезье районы Хозесаново авылында Анна Мироваевадан Р. Вамба-Исхакова тарафыннан  язып  алынганнар.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты