Кыз елату җырлары, сыктаулар

Бикләдегез тимер йозакка

Ай, бу чыбылдыгым чачагы ¹,
Чачагыкай саен мунчагы;
Яшь башымны сорап килделәр,
Әле акылымның юк чагы.

Үзе генә аяз, үзе җил,
Әрнетәдер минем битемне;
Әрнеп кенә әрнеп мин еласам,
Кем жәлләсен бездәй ятимне?

Теге очкайлардан ис килә,
Кузничлар яндыра күмерне;
Мине шушы йортларга бирдегез,
Хисап итмәдегез гомерне.

Җыелыгыз, җиңгәләр, җыелыгыз,
Җыелып та каршыма килегез;
Җыелып та каршыма килегез,
Үз әтиемә илтегез.

Кара урманнарда төтен чыга,
Кемнәр яндыралар күмерне?
Мине шул өйләргә бирдегез,
Елап үтсен диеп гомере.

Бирдегез, әти, еракка,
Бикләдегез тимер йозакка;
Тимер йозакларны өзәлмам,
Сезне күрми, әти, түзәлмам.

Өстәлем өстендә тутый кош,
Куркытма, әнкәй, ашасын;
Җитәр, җитәр, диеп сез әйтмәгез,
Елыйм, тулган эчем бушасын.

Яраштырып куйган мылтыкны
Урамга чыгарып атыгыз;
Барыгыз, агайлар, әйтегез,
Риза булмый диеп кайтыгыз.

Риза булырдай бу эш түгел.
Яшь җаным тынардай төш түгел.

Азанчылар бара азанга,
Муллалар төшәләр намазга;
Мине шул өйләргә биргәнче,
Салыр идегез кайнаган казанга.

¹ Чачаг — чук

I.  «Татар халык иҗаты», төзүчеләре: Г. Бәширов, А. Шамов, X. Ярми, X. Усманов.   Казан,   1951,   260   бит.

II.  ТХҖ,   241    бит.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты