Кыз елату җырлары, сыктаулар

Атакаем мине яшьтәй бирде

Арттан килгән кодаларның
Эшлиякәйләре яшел чук;
Алдан ла килгән яшь коданы,
Илаһым кадир ¹, яшен сук.

Урак та урдым сызганып,
Печән дә чаптым сызганып;
Атакаем мине яшьтәй бирде
Кара икмәккәйләрен кызганып.

Кода да булган Таһирның күлмәге
Сандыкта ятып кабыккан ²;
Кияү дә булган Локман-Хәким
Пивнойда ятып ябыккан.

Аргы якта да ак тана,
Бирге якта да ак тана;
Кодагый да булган Латифа
Кеше бүркен киеп мактана.

Түгәрәк тә күлне өч әйләндем,
Ак кармаккай ята ялтырап;
Кайне ³ каршына барып төшкәч
Күпме торым икән калтырап.

Тептер дә тептер тоягым
Тептердәп кала шушы илдә;
Кыңгырау кебек тавышым
Шылтырап кала шушы илдә.

¹ Илаһым кадир — кодрәтле Аллам.
² Кабыгу — күгәрү.
³ Кайне — каенана.

I. ФФ, 1971, Иркутск өлкәсе Аларск районы Новоселово авылында Гыйльмениса Нурдәүләтовадан   Ф.   Хәкимова   язып   алган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты