Кыз елату җырлары, сыктаулар

Ятка яравы  кыен

Егетләр:

Ак шарф та бәйләдең,
Күк шарф та бәйләдең;
Әткәң-әнкәң кулларында
Актык җәйләр җәйләдең.

Безнең урам киртләч-киртләч,
Киртләч бетәр яз җиткәч;
Ирләр кайта хезмәт иткәч,
Кызлар кайтмый бер киткәч.

Кызлар:

Самоварны тиз кайната
Яшь каенның күмере;
Ата-анада кыз баланың
Унсигез ел гомере.

Китәсе кыз:

Агач башы күк тиен,
Атып алуы кыен;
Ятка бару берни түгел,
Ятка яравы кыен.

I. М. Мәһдиев. Себер татарлары иҗаты. «Казан утлары», 1968, № 10, 130 бит. Текст 1967 елда Новосибирск өлкәсенең Тобол районы Кызылкаш авылында Хаҗиәхмәт Аблиннан (1897 елгы) М. Мәһдиев тарафыннан язып алынган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты