Кыз елату җырлары, сыктаулар

Тагы бер-ике ел тотмадыгыз

Катламакай казан, ай, астыгыз,
Әллә пешмәс диеп белдегез;
Тагы бер-ике ел тотмадыгыз,
Әллә китмәс диеп белдегез.

Әнкәй шикәр ватадыр,
Бохарадан алган тоз кебек;
Тагын бер-ике ел тотмадыгыз
Асрауга алган кыз кебек.

Мыскалларга салып, ай, үлчиләр
Ашка сала торган тозны да;
Тагы бер-ике ел, ай, тоталар
Асрамага алган кызны да.

Иртә генә мороз, кичтә — салкын,
Шытыр да гына шытыр итәдер;
Иркәләнеп үскән иркә башым
Ирексез җирләргә китәдер.

Чыктым асыл кошлар, ай, атарга,
Асыл кошлар киткән далага;
Мине соң сез, ай, ничек бирәсез
Кеше анасына балага.

I.  Л. Арсланов «Ставрополь татарлары бәетләре». «Казан утлары», 1973, № 12, 173 бит. Әсәрне Ставрополь өлкәсенең Ипатов районы Кече Баркыичак авылында Сафия   Хисаметдиновадан   Л.   Арсланов   язып   алган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты