Кыз елату җырлары, сыктаулар

Дөбер-дөбер туйлар  килә

Шыбыр-шыбыр яңгыр ява
Чыршы келәт башына;
Дөбер-дөбер туйлар килә
Кыз белән егет башына.

Ап-ак, ап-ак йомычка
Учакларда көл була;
Бикә кебек тиңдәшебез
Ятка китеп хур була.

Ике кием башмагым бар,
Ничек киеп туздырыйм?
Җан сөймәгән кешегә китеп,
Ничек гомер уздырыйм?

Ефәк янчык төбендә
Алтын тәңкә бар микән?
Безнең әтиләр кебек
Ирексез бирүче бар микән?

Алмагачның төпләренә
Тары тишелер микән?
Минем уф дип сулаганны
Туганнар ишетер микән?

Көтүдән кайткан сыерның
Сөтен сау да шикәр ит;
Әй әнекәм, әнекәм,
Күкрәк сөтең бәхил ит.

Әй аландыр, аландыр,
Аланда үскән баландыр;
Әй әтекәм, әтекәм,
Итәгеңдә үскән балаңдыр.

I ФФ, 1955, ТАССРның Подберезье районы Иске Тәрбид авылында Дәрья Бикмәтовадан Ш. Зәбиров язып алган.

II.  ТХҖ.   252   бит.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты