Кыз елату җырлары, сыктаулар

Ятим үскән  кыз елавы

Аргы очлардан көтү киләдер,
Кычкыра киләдер танабыз;
Нигә еламыйм, тиңнәрем,
Юктыр озатырга анабыз.

Күктә күк күгәрчен уйныйдыр,
Башына кияргә бүрке юк;
Әтекәем туйлар уйныйдыр,
Әнекәйдән башка күрке юк.

Кара да гына кара карлыган,
Аның чын карасы коелган;
Минем лә күңел сыныккан
Әни лә кәбәмнең югыннан.

Борма-борма гына баскычтан
Борылып ла менгән мин булдым;
Тиңнәр арасында тиң булдым да,
Анага моңайган мин булдым.

Урман эчендәге аланның
Кемнәр җыя икән баланын?
Күкрәккәе дәртле, күзе яшьле
Анасыз ла үскән баланың.

Кулымдагы нәзек беләзекне
Балавыздан баскан, кул кыскан;
Минем анам кәбәм сорасагыз,
Туфрак кына баскан, гүр кыскан.

Иртә белән бардым инешкә,
Тиңнәрем җыенган җимешкә;
Бөтен кардәшләрем озатыша,
Әни кәбәм юктыр киңәшкә.

Чүлмәк тә чүлмәк сары май
Мич култыгында эридер;
Әни кәбәемне сорасагыз,
Гүр култыгында черидер.

Кара чәчләремнең толымнарын
Бер сүттем дә тагын бер үрдем;
Үги ана килгәч, яннарында
Күп тормасам да күп күрдем.

I. ФФ. 1957 Мордва АССРның Ләмбрә районы Пензятка авылында 3өһрә Нарбиковадан Х. Ярми һәм Темников районы Тат. Карай авылында Фәүзия Акбулатовадан    И. Надиров    язып    алган.

II. ТХҖ,    255    бит.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты