Кыз елату җырлары, сыктаулар

Үзем кунак, сүзем бүләк

Күпер салдым тар җиргә,
Гөлчәчәкләре бар җиргә;
Әтекәем, мине саттың
Эт баласы тормас жар җиргә ¹.

Агыйделкәй аша уклар аттым,
Төшермәсен аны камышка;
Төшсә дә генә төшсен, ай, камышка,—
Төшермәсен усал кайнишкә.

Ишеккәем алды, ай, бүтәгә²,
Ат аяккайларын күтәрә;
Туганкачайларым, сау булыгыз,
Ат җигелгән миңа китәргә.

Ишек алларым тутый кош,
Очып килсә — котыгыз ³;
Үзем кунак, сүзем бүләк,
Искәйләрегездә тотыгыз.

¹ Жар  жир — кызу җир, начар урын мәгънәсендә
² Бүтәгә — вак үлән
³ Кот — бәхет.

I. БДУФФ, 1970, Башкортстанның  Чакмагыш районы Иске Ихсан  авылында Әхмәтҗанова  Миңнеямалдан   (1910  елгы)   язып   алучы  Р.  Мөхәммәтҗанов.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты