Кыз елату җырлары, сыктаулар

Көндәш өстенә бирдегез

Чапчак та чапчак сары борчак,
Бетмәс кенә кебек күрдегез;
Орыштыгыз бәне, суктыгыз,
Китмәс кенә кебек күрдегез.

Әтекәемнең идәне
Мин баскан саен бөгелә;
Агакаем белән җиңгәкәем
Мин киткәннәремә сөенә.

Саплы ла төймә кадерле,
Сапсыз ла төймә кадерсез;
Аналыкай бала кадерле,
Анасызкай бала кадерсез.

Агакаем, тугар туратыңны,
Бәйлә дә куй каен төбенә;
Унбиш яшьтән озатканчы,
Ташла да куй суның төбенә.

Чуен да чүлмәк бирдегез,
Тик кайнасын дидегез;
Көндәш өстенә бирдегез,
Көн күрмәсен дидегез.

I. БДУФФ,  1974, Башкортстанның Балтач районы Иске   Яхшай   авылыңда  Тәгълимә Шәрифгалиевадан (1912 елгы) язып алучы Р   Мөхәммәтҗанов.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты