Кыз елату җырлары, сыктаулар

Илләрдән китү бик авыр

Әтекәемнең балтасы
Тотылмый ятып тут булган;
Әтекәемнең биргән җире
Кояшсыз ятып ут булган.

Бәйләмә, җиңгә, билемне,
Билбавым билемә бата ла;
Җылама, җиңгә,
җылама, Әйткән лә сүзең ата ла ¹.

Бурадагы ашларымны
Ашатмадың, әтекәй;
Төймәдәй лә башларымны
Яшәтмәдең, әтекәй.

Инәкәемнең мичкәе
Яшел дә күк булсачы;
Инәкәемнең өеннән
Китмәстәй йола булсачы.

Безнең авыллар зур авыл,
Каралып килә җил-давыл;
Илләрдән китү бик авыр,
Өзелеп бара эч-бавыр.

¹ Сүзең ата — сүзең күңелемә тиң, авыр була мәгънәсендә.

I   БДУФФ.   1967,   Башкортстанның   Ярмәкәй   районы   Иске   Турай   авылында Хәсбикамал Фәрихуллинадан язып алучы Р. Мөхәммәтҗанов.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты