Кыз елату җырлары, сыктаулар

Исеңә төшәр, инәкәм

Кыз:

Бурлат та чаршау, ефәк бау,
Кор, дисәң дә, кормам, инәкәм;
Китәр лә вакыт җиткән инде,
Тор, дисәң дә, тормам, инәкәм.

Ана:

Утырсаң, балам, көймә түренә,
Карарсың сулар төбенә;
Су төбекәендә һич кара юк,
Башыңа төшкәч,   китмәй чараң юк.

Кыз:

Бурлат чаршау шәүләләре
Битеңә төшәр, инәкәм;
Миңа тиңдәй кызлар күрсәң,
Исеңә төшәр, инәкәм.

Ана:

Бисмиллаһи рахман ирраһим,
Әүвәледән иман шарт, имеш;
Ата йортыннан чыгып китү
Әҗәлләрдән яман эш, имеш.

Кыз:

Бурлат та чаршау, кылыч бау,
Син кордырттың, инәкәм;
Килгән дә кода китәр иде,
Син бирдерттең, инәкәм.

Ана:

Чү-чү, балам, авыр әйтмә,
Җылы сүз генә — сөт кебек;
Аерылулар миңа җиңелмени,
Өзеләм тегәрҗеп кебек.

I   БДУФФ, 1973, Башкортстанның   Стәрлебаш   районы Тетор Арслан   авылында Зәкия Мирзаевадан   (1901 елда туган) Р. Мөхәммәтҗанов  язып алган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты