Кыз елату җырлары, сыктаулар

Әнекәй дә барган әтекәйгә...

Әнекәй дә барган әтекәйгә,
Түтекәй дә барган җизнәйгә,
Мине генә бирдегез яткайга,
Озатасыз бәйләп читкәйгә.

Күтәрмәсе биек      менә алмам,
Ишекләре кыек — керә алмам;
Әнекәемә генә өйрәнгәнмен,
Әнекәемсез һич тә тора алмам.

Күк үләнкәй нигә үсә икән,
Янып-көеп китәр кау өчен ¹;
Кыз балакай нигә үсә икән,
Сатылып та китәр мал өчен.

Әнекәй дә барган әтекәйгә,
Китәсем лә килми читкәйгә;
Әтекәем кайда чыгып киткән,
Ояттыр шул    саткач яткайга.

Кил әле, түтекәем, каршыма,
Таянаемчы яурын башыңа ²;
Яурын башым минем талды инде,
Бәхил дә генә булып кал инде.

¹ Кау  өчен — ут кабызу өчен

² Яурынбаш — иңбаш,   кулбашы.

I   БДУФФ,  1969,   Башкортстанның   Туймазы   районы   Саран   авылында     Мәрзия Аслаевадан   (1903  елгы)   язып   алучы  Р. Мөхәммәтҗанов.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты