Кыз елату җырлары, сыктаулар

Фатыйхадан ташламагыз

Киртәдә торган алакай ¹
Урамга чыгып аунаклай;
Мал алганда яхшы идең,
Качып ла киттең, атакай.

Мәрҗәннәр булып өзелмәм,
Тәңкәләр булып тезелмәм;
Ошамаган да авылга
Килен дә булып сөзелмәм.

Утырдым тәрәз төбенә
Егерме чәүкә очканчы,
Утырырмын дигән идем
Егерме яшькә күчкәнче.

Каралы язу каралы,
Каралары бетеп бара ла;
Уф аллам да уф аллам,
Туганнар калып бара ла.

Ак келәтнең асларына
Үрдәк тә сыя, каз сыймый;
Бу дөньяның эчләренә
Ир бала сыя, кыз сыймый.

Атакаемның өендә
Яшел дә ястык тышладым;
Атакаемның өендә
Актык та кышым кышладым.

Ай, саз үтә, саз үтә,
Аяккаема су үтә;
Бармастайга көчләделәр,—
Үзәккәемә шул үтә.

Мәрҗәннәр тездем ефәккә,
Ташлап та киттем түшәккә;
Ят кешенең һәрбер сүзе
Талап та керер үзәккә.

Атакаем йортын салды,
Кыегы биек булсын дип;
Атакаем яшьләй сатты,
Күңеле боек булсын дип.

Тактадай такта балавыз;
Такта өсләренә алабыз;
Фатыйхадан ташламагыз,
Кулыгызда үскән балагыз.

¹ Алакай — ала   эт.

I. БДУФФ,   1971, Башкортстанның Бәләбәй  районы  Байморза  авылында Хәкимә Хәбибуллинадан (1896 елда туган) Р.   Мөхәммәтҗанов язып алган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты