Кыз елату җырлары, сыктаулар

Кыз балакай, кыз балакай

Һавадагы аккошның
Тырнаккае юк бахырның;
Бу җыламый кем җыласын,—
Анакае юк бахырның.

Зур тәрәзә төбендә
Баллыкай конфет — бер кисәк;
Кыз балакай, кыз балакай,
Гомере бары бер чәчәк.

Атакаемның өендә —
Ак тастымалы чөендә;
Атакаем ник җыласын,—
Себер паласы иңендә.

Иртән торып тышка чыксам,
Агач башыннан көн туган;
Елама дип сез әйтәсез,
Ата йортыннан кем туйган?

Өч аеры чәч бауларым
Чөйдә калды, атакаем;
Сөймәгәнгә биргәнеңне
Сизмәй калдым, атакаем.

Китә кызлар яше җиткәч,
Ризыгын хак читкә сипкәч;
Ир балалар кайта киткәч,
Кызлар кайтмый бер киткәч.

Атыңа печән сал, җиңгә,
Авызлыгын ал, җиңгә;
Башыма яулык япканчы,
Татлы җаным ал, җиңгә.

Ике лә туры пар җиктең,
Урталарына тай җиктең;
Тайның хәлен атлар белә,—
Кыз бала хәлен кем белә.

Мич асларында таш сандык,
Ташласаң да уалмый;
Кыз балакай, кыз балакай,
Сине беркем дә кызганмый.

I. БДУФФ, 1968, Башкортстанның   Ярмәкәй   районы  Усман-Ташлы   авылында Сафура  Сәлимгәрәевадан   (1897  елгы) язып алучы  Р.  Мөхәммәтҗанов.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты