Кыз елату җырлары, сыктаулар

Әйтмә лә инде, балам, дип

Француз яулыклар ябынып,
Йөрдем лә урам балкытып;
Үз инәкәем булмагач,
Йөрдем лә кеше ялкытып.

Өй башындагы тирене
Җил төшереп, эт ашый;
Димләп тә йөргән яучылар
Сылтау табып ит ашый.

Әтекәемнең арышы,—
Тау сыртына карышы;
Әтекәем килде нисә,
Кем чыгар икән карышы.

Ай-һай ла күмәч пешердең,
Ышкындың да тыкшындың;
Бу убыр кайчан китә дип,
Җиңгәм, син бит пошындың.

Әтекәем миңа ат бирде,
Маңгае кашка булсын дип;
Әтекәем мине яшьләй бирде,
Бавыры ¹ башка булсын дип.

Ата ла кәккүк баласын
Атма ла, әти, алам дип;
Әтекәем үзең ятка саттың,
Әйтмә лә инде, балам, дип.

¹ Бавыр — бу урында ризык, аш.

I. БДУФФ, 1970, Башкортстанның Аскын районы Әмир авылында Газзәт Зариповадан   Р.   Мөхәммәтҗанов   язып   алган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты