Кыз елату җырлары, сыктаулар

Урыным ятып  калды, туганый

Олы илгенәмнең башында
Урагым ятып калды, туганый;
Урагым өчен кайгырмаем,
Урыным ятып калды, туганый.

Кушлап ла кушлап тагарга
Куш төймәкәй кирәк, туганый;
Кушлап ла кушлап сыктарга
Үз инәкәң кирәк, туганый.

Су төбендәге ыстаканны
Алып кына ла булмый, туганый;
Мал урынына сатып эчкәч,
Калып кына ла булмый, туганый.

Француз яулыклар бизәкле,
Ябынасым килми, туганый;
Чит-ятларның арбасына
Утырасым килми, туганый.

I. БДУФФ,   1973,   Башкортстанның Ярмәкәй районы Аксаково авылында Разия Шәрәфиевадан    Р.   Мөхәммәтҗанов    язып    алган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты