Кыз елату җырлары, сыктаулар

Янар да сүнәр ут түгел

Агач та башын яңгыраткан
Нинди дә кәккүк баласы?
Авыл да арасын яңгыраткан
Кемнең дә газиз баласы?

Авыл арасыннан узаем,
Яшел дә җефәк сузаем;
Яшел дә җефәк, яшь йөрәк,—
Еламай да ничек түзәем.

Карагайның була тугае,
Тугаенда була тургае;
Карагай да өйнең эчендә
Уналты ел булдым тулае ¹.

Әтекәй, печән чабарсың,
Чапкан да юлың киң булмас;
Әтекәй, бала асрарсың,
Асраган балаң мин булмас.

Әтекәй, бирдең якынга,
Якынга түгел, ялкынга;
Янар да сүнәр ут түгел,
Җаныкаем түзәр тут² түгел.

¹ Тулае - тулысы, барлыгы
² Тут -  күңелдәге кайгы, сагыш мәгънәсендә

I. БДУФФ,   1966,  Башкортстанның  Бакалы районы Балыклы  авылында  Миңлеямал Зиятдиновадан   (1898 елда туган)   язып  алучы  Р.  Мөхәммәтҗанов.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты