Кыз елату җырлары, сыктаулар

Сеңелкәем, сулыгып  елама

Сеңелкәем, китәсең чит-ятка,
Тамагыңа үтмәс ашларың;
Елан телле усал кайнанаң
Ашар инде; синең башларың.

Каенатаң булыр мәрхәмәтсез,
Каенсеңелләрең тупаслар;
Сеңелкәем,  сине, ятимәне
Иркә сүз  белән дә уятмаслар.

Сеңелкәем, сулыгып елама,
Еламаны, дисәм, инанма;
Сыктамасаң ата йортында,—
Кан койдырыр кансыз кайнана.

Безнең әткәй сука эрәтли,
Сабан сөрәм диеп беләме?
Сеңелкәем, сине саткан чакта,
Хайван бирәм диеп беләме?

I. БДУФФ,   1970,  Башкортстанның  Бүздәк  районы    Күбәк   авылында  Миңлегөл Шакировадан (1897 елда туган) Р. Мөхәммәтҗанов язып алган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты