Кыз елату җырлары, сыктаулар

Тимер  йозакларны өзәлмам

Торыгыз, тиңнәрем, торыгыз,
Канатларым минем каерылды;
Сизәсезме икән, күрәсезме,
Безнең юллар инде аерылды.

Аердылар озак-озакка.
Бикләделәр тимер йозакка;
Тимер йозакларны өзәлмам,
Тиңнәремне күрми түзәлмам.

Әй, әткәемнең морҗасы,
Яшел кирпеч кенә булсачы;
Әй, әткәемнең өеннән
Китмәс кенә йола булсачы.

Базарга бардың, әткәй, ни алдың? —
Яфрак хәтлем акчасын алдың;
Яфрак хәтлем акчаң җил китте,
Газиз балаң бәгърен ут итте.

Ай, ишегең, әткәй, ишегең,
Ишегеңне ачар кеше идем;
Асрый гына белгән кешегә
Асу гына итәр кеше идем.

I. БДУФФ,   1966,   Башкортстанның   Бакалы   районы   Акман     авылында     Дәрья Максимовадан (1908 елда туган)  Р. Мөхәммәтҗанов язып алган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты