«Ишек бавы»  җырлары

Ишек бавы (Икенче вариант)

Ишек бавы бер алтын,
Безнең туган мең алтын;
Ашыкма, кияү, керерсең,
Җырлашып алыйк бер тын.

Акча бирмиенчә, кияү,
Уйлама син, керергә;
Акчаңны жәлләми бирсәң,
Гомер итәрсең бергә.

Пар ат белән чабар идек,
Сезнең урамыгыз тар;
Акча кызганмагыз, кияү,
Безнең хур кызыбыз бар.

Без сораган акчаны бир,
Зинһар, кияү, карышма;
Тормышыңның бәхетен кисеп,
Акча жәлләп тартышма.

Бирсәң бир син, күп безгә,
Без риза түгел азга;
Илле сум да әрәм түгел
Син ала торган кызга.

Пәлтәләрен киенсә дә,
Мамык шәлен бәйләми;
Кыз куйнына кергәндә,
Егет акча жәлләми.

I    ФФ, 1967, Новосибирск өлкәсенең Колыван районы Умар авылында Гөлминәвәр   Шәмсетдиновадан   X.  Гатина   язып   алган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты