Туй мәҗлесе вакытында мактау-макташу җырлары

Бер дан  итеп  күңел ачыек

Кыз алырга килүчеләр:

Имән сайгаклары имерек ¹,
Юкә сайгаклары җимерек;
Кыңгыраулар тагып, ястык салып,
Кыз алырга килдек җимереп.

Килгән  кодага:

Кодакаем, сиңа ни бирим?
Казаннардан алган малым юк;
Җаннарым ярып бирер идем,
Җандин үзгә торыр хәлем юк.

Басмадин басма басыек,
Ефәкләрдән тасма ясыек;
Җыен кодалар җыелышкач,
Бер дан итеп күңел ачыек.

Биеккәй тауның башларында
Шаулыйдыр нарат башлары;
Шикәрдин тәмле, балдин татлы
Безнең кодагыйның ашлары.

Кодагыйлар   күчтәнәч,   чыгарганда:

Ике лә җирән атыгыз,
Аның берсен безгә сатыгыз;
Бу кадәрле күчтәнәчне
Ничек лә тартып килде атыгыз?

Күчтәнәч   китерүчеләр:

Япан җирләрдә тегермән
Ялан гына бодай тартадыр;
Безнең әтекәйнең атлары
Ниләр салсак, шуны тартадыр.

Иртән торып сыер саудым,
Ак бидрәләрем тулсын дип;
Сезләр чакыргачтын, безләр килдек,
Сезнең күңелегез булсын дип.

Ишек алларында алты мичкә,
Аның алтысы да бал диләр;
Ямьле Мәлкән буйларында
Син кодакайны бай диләр.

Ай-һай, юлларның тигезе,
Мөгерәп  килә  бояр үгезе;
Озаккай гомер эчләрендә
Кирәккәй була ярның тигезе.

¹ Имерек — нык, таза.

I.  ФФ,   1949, Татарстанның Минзәлә  районы Мәккәи авылында Аксинья  Юзмановадан X. Ярми язып алган.

II.  ТХҖ,   269—271    битләр.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты