Туй мәҗлесе вакытында мактау-макташу җырлары

Безнең бәбекәбез сезгә бара

Кыз ягы:

Җырларга кушсаң, җырлармын,
Гөрләргә кушсаң, гөрләрмен;
Килгән кодалар хакы өчен,
Җырлау түгел, егылып үләрмен.

Баскычыма басмас идегез,
Баскычларым бадъян агачы;
Бу җырларны шәт җырламас идем,
Кодаларым дөнья бәясе.

Кодалар, кодалар килгәннәр,
Өсләренә пустаулар кигәннәр;
Пустаулар да кими ни кисеннәр,
Бар да бертуганнар килгәннәр.

Түшләреңә кигән биш тәңкәнең
Ничек итеп чутын алыем?
Сезнең кебек чибәр кодаларның
Ничек итеп күңелен табыем?

Егет ягы:

Килеп тә кердем өеңә,
Гарнитурны элдем чөеңә;
Гарнитурдан тамган тамчы кебек
Күренәсез минем күземә.

Бүлмә ишеккәен син ачып куй,
Бүлмәләргә качып калмасын;
Кызыбыз матур дип үк мактанмагыз,
Алып килдек егетнең алмасын.

Кара сыерларның мөгезләрен
Каерып алырга дип килдек без;
Әнкәсеннән туган бәбекәсен
Аерып алырга дип килдек без.

Кыз ягы:

Табак та табак, ай, ак борчак,
Чәчми генә түкми тотыгыз;
Безнең кызларыбыз сезгә бара,
Какмый гына сукмый тотыгыз.

Биеккәй дә тауның башларында
Сыкы ява диләр диңгезгә;
Кара гына кашлы, зифа буйлы,
Изгелек итсен иде ул сезгә.

Әй, ай батсын иде, ай батсын,
Айлар баткач якты таң атсын;
Безнең кызларыбыз сезгә бара,
Йорт анагыз аны яратсын.

Ындыр артларындагы кибәнеңнең
Аякларын үзең куйсана;
Безнең кызларыбыз сезгә китә,
Әнкәсе лә үзең булсана.

Кыз   әйберләрен   элгәндә:

Бадъян да салдым акмаска,
Каләмперләр ¹ салдым батмаска;
Бу әйберләрне без эләбез —
Берсесе дә кире кайтмаска.

¹  Каләмпер — канәфер.

I.  ФФ,   1940,  Татарстанның  Бондюг  районы  Иске   Гришкино  авылында  X. Ярми язып    алган.

II.  «Татар  халык иҗаты»,   1951,  262—264  битләр;  ТХҖ   274—276 битләр

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты