Туй мәҗлесе вакытында мактау-макташу җырлары

Кияү, канаткаем, сиңа әйтәм

Егет ягы:

Челтерәп кенә ага суыбыз,
Ялтырап кына ката бозыбыз;
Ак арслан кебек егетебез,
Ничек икән сезнең кызыгыз?

Кыз  ягы:

Билләреңә буган билбауларың
Укалардай үргән камчы күк;
Безнең кызыбызны сорасагыз,
Алтыннардан тамган тамчы күк.

Безнең кызның чәче бигрәк шома,
Алтын кайчы белән кискәнгә;
Буй-сыннары камыш кебек зифа,
Баг алмасы ашап үскәнгә.

Егет ягы:

Ай-ай гына, ай-ай, аярмы?
Тау менгәндә болан таярмы?
Болан кебек матур егеткә
Әнекәсе кызын аярмы?

Кыз ягы:

Йөгереп төштем суның буена,
Бер матуркай ярма юа иде;
Ярмалары — дөге ярмасы,
Ә кызыбыз — алтын алмасы.

Егет ягы:

Биек кенә тауның башында
Бөгәрләнеп ята күк тәкә;
Сезнең кызыгызны без белмибез,
Безнең егетебез мең тәңкә.

Кыз ягы:

Бакча тулы бохар алмасы,
Кайсыларын икән сатасы?
Бирмәс идек сылу кызыбызны,
Күп инәлде егет атасы.

Егет ягы:

Тәрәзә төпләре гөл генә,
Кына гөле никтер бер генә;
Сезнең кызыгыздай зифа буйлы
Тирә-күрше илдә бер генә.

Кыз ягы:

Өстәл өсләрендә ак тустаган,
Балын кемнәр эчкән — бушаган;
Кияү тиешледән күз алмыйбыз,
Бигрәк акыллыга охшаган.

Биек кенә тауның башында
Ялтырап ла ята каптырма;
Кияү, канаткаем, сиңа әйтәм,
Үзеңнән бүтәнгә кактырма.

Киртәләрне тотсаң иртә тот,
3әй буйларына җитә тот;
Кызыбызны сиңа ышандык,
Какмый гына сукмый иркә тот.

Ак мич эчләренә ни куелган? —
Вак бәлешләр белән тутырма;
Асыл яр куены сине көтә,
Кыяр гына кыймас утырма.

Егет ягы:

Аллар гына аллар булса иде,
Ал булмаса баллар булса иде;
Малларыбыз әрәм булмас иде,
Ят тимәгән ярлар булса иде.

Күккә күк күгәрчен, ай, очырдык,
Олы гына юлга төшердек;
Инде генә шөкер бер ходайга,
Асыл кызны кулга төшердек.

I. ФФ,   1953,  Татарстанның  Чистай  районы   Бахта   авылында   Гелина  Азиевадан һәм Ульяна Филипповадан С.  Гарипов язып алган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты