Туй мәҗлесе вакытында мактау-макташу җырлары

Бәхетең бар, кода, дәүләтең бар

Синең генә, кода, атларың,
Алдан җибәр җирән чаптарын;
Бәхетең бар, кода, дәүләтең бар,
Рәхәт кенә яшәр чакларың.

Кызыл гына төлке кырлар күрке,
Камчат та гына бүрек ир күрке;
Камчат та гына бүрек ирләр күрке —
Сез кодакайлар — түр күрке.

Каргалыкай буе түтәл-түтәл.
Түтәленнән былбыл кош үтәр;
Бу дөнъялар бездән үтәр китәр,
Тату яшәүләргә ни җитәр.

Кикрикүк әтәч — күк әтәч,
Кычкырыр ла вакыт җитте инде;
Ашадык-эчтек, сәрхүш булдык,—
Китәр вакытлар да җитте инде.

Атлап барыйк үрне менгәнче,
Ташлашмаек гүргә кергәнче;
Атлый-йөгерә килә күк юрга,
Хәерле гомер бирсен күп елга.

I. Срур Сүнчәләй. Каргалыда татар туе. «Казан утлары», 1967, 5 сан, 145 бит. Җырлар Оренбург өлкәсенең Каргалы авылында егерменче еллар башында язып алынган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты