Бирнә сорау җырлары

Кодагый, маем, сиңа әйтәм

Беренче кодагый:

Ай, имештән-имештән,
Тун төймәсе көмештән;
Кодагый, маем, сиңа әйтәм,
Яхшы бирнә бирештән.

Икенче кодагый:

Муенсаңның очларына
Ник такмадың көмешен?
Яхшы бирнә син сорыйсың,
Бирерсеңме өлешен?

Түбәндәге җырларны, туйның кайсы  яктан килүенә   карап,   ике якның берсе әйтә:

Күлмәгемә итәк тектем,
Аклы ситса кисәкләп;
Сезгә нинди бүләк җитсен,
Җыелгансыз дистәләп.

Артыбызда агым суда
Ак үрдәкләр йөзәдер;
Мәһәр тутырмыйча бирдең,
Ничек битең түзәдер?

Кодагыйның комганы,
Нидер тулган борынына;
Кодагыйга нидер булган,
Тик торалмый урынында.

Урта тәрәзә төбендә
Бер тәрәзә уегыз;
Бит себергеч ¹ өсләренә
Бер шәльяулык куегыз.

Уң кулында биш бармагың,
Каян алдың балдагың?
Кодагый, маем, алдадың,
Яхшы бирнә салмадың.

¹ Бит   себергеч — тастымал

I.   ФФ, 1964. Ульянов өлкәсенең Карсун районы Тат. Горенки авылында Фагилә Аксеновадан һәм Миңкамал Якуповадан язып алучы И. Надиров. Текстка түбәндәге искәрмә бирелгән: «Карсун районына кергән татар-мишәр авылларында туй капка төбенә килеп туктагач, капканың ике ягында торучы хатын-кызлар, кодагыйлар ко дачалар  кара-каршы  җыр  әйтешәләр.   Җырларда  сүз  бирнә  бүләге  хакында  бара»

II.    ТХҖ,   283   бит.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты