Килен төшерү җырлары, арбаулар

Ак күңелдән арбау салам

Исән генә килдеңме, балам,
Ак күңелдән сиңа арбау салам:
Төкле аягың белән, талмас кулың,
Таймас табаның белән кил!
Юраганың юш булсын,
Курыкканың буш булсын;
Яңгышагың юл булсын,
Эшең, көнең уң булсын,
Ашың, суың мул булсын;
Йөзең айдай,
Сүзең балдай,
Күңелең майдай булсын;
Арсландай алты батырың,
Җиләктәй җиде матурың тусын;
Батырларың мал тапсын,
Матурларың яр тапсын,—
Алтының алтындай игелеген,
Җиденең җефәктән изгелеген күреп картай!

I. Ф. Түйкә. Халык әдәбиятын тикшерү юлында. «Безнең юл» журналы, 1927 ел, 8   сан.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты