Килен төшерү җырлары, арбаулар

Китмәскә килерең булсын

Казаның өреле булсын,
Китмәскә килерең булсын,
Чүмергәнең май булсын,
Ашаганың бал булсын;
Семьяң ишле, бай булсын,
Абзарың тулы мал булсын;
Күңелең кинә тотмасын,
Авызың серкә йотмасын;
Сыер-танаң мөңгердәп,
Кош-кортларың көңгердәп
Күз ачтырсын, киленем,
Көн ачтырсын, киленем;
Өлгерем бул, киленем,—
Арбавым шушы минем.

I. Р. Мөхәммәтҗанов. Туй йола поэзиясе. «Татар әдәбияты мәсьәләләре». Уфа, 1972, 49 бит Текстны 1967 елда Башкортстанның Ярмәкәй районы Иске Турай авылында Гөлмәдинә Сәмигуллинадан Р. Мөхәммәтҗанов язып алган.

«Татар халык иҗаты. Йола һәм уен җырлары», Казан, Татарстан китап нәшрияты, 1980

СССР Фәннәр академиясенең Казан филиалы Галимҗан Ибраһимов исемендәге Тел, әдәбият һәм тарих институты